F’ċerimonja li saret il-Ħamis, is-16 Ġunju 2016, id-Dipartiment tal-Kuntratti rebaħ waħda mill-kategoriji fl-edizzjoni ta’ din is-sena tan-National Enterprise Support Awards (NESA) organizzati mid-Dipartiment tal-Kummerċ fi ħdan il-Ministeru għall-Ekonomija, Investiment u Negozji Żgħar.

Din il-kompetizzjoni kienet miftuħa għal diversi tipi ta’ organizzazzjonijiet li jikkompetu fi tliet taqsimiet differenti; il-kunsilli lokali li jikkompetu fit-Taqsima “A”, il-ministeri, id-dipartimenti, l-awtoritajiet u l-entitajiet pubbliċi u s-sħubijiet pubbliċi-privati li jikkompetu fit-Taqsima “B”, u l-NGOs, it-trejdjunjins, l-assoċjazzjonijiet professjonali, l-iskejjel pubbliċi u tal-knisja, il-programmi edukattivi u l-organizzazzjonijiet tan-negozju li jikkompetu fit-Taqsima “C”.

Id-dħul tad-Dipartiment tal-Kuntratti ffoka fuq il-kategorija ’It-titjib tal-Ambjent tan-Negozju‘ li jirrikonoxxi politiki innovattivi fil-livell nazzjonali jew lokali li jippromwovu l-bidu u t-tkabbir tal-intrapriżi, jissimplifikaw il-proċeduri leġiżlattivi u amministrattivi għan-negozji u jimplimentaw il-prinċipju ‘Aħseb l-Ewwel fiż-Żgħir’ favur l-intrapriżi żgħar u ta’ daqs medju.  Id-dħul tad-Dipartiment spjega kif dan ta’ hawn fuq inkiseb permezz tal-introduzzjoni tal-Electronic Public Procurement System, sistema li rrivoluzzjonat il-mod kif jitmexxa l-akkwist pubbliku f’Malta permezz tal-użu tal-ICT.

Is-Sistema Elettronika tal-Akkwist Pubbliku għandha għadd ta’ vantaġġi għall-intrapriżi.  Primarjament, hija sistema bbażata fuq il-web u għalhekk aċċessibbli kullimkien u f’kull ħin.  Karatteristika innovattiva u utli ħafna għall-intrapriżi hija l-funzjoni ta’ twissija tas-sejħa għall-offerti li permezz tagħha l-operaturi ekonomiċi meta jirreġistraw ikunu jistgħu jagħżlu liema tipi ta’ sejħiet għall-offerti jkunu interessati fihom, skont it-tip ta’ xogħol, provvista jew servizz li jipprovdu.  Imbagħad l-operaturi ekonomiċi kienu jirċievu allerti kull meta toħroġ tender taħt il-qasam ta’ interess tagħhom u allura titneħħa l-ħtieġa li wieħed jgħaddi minn listi ta’ avviżi ta’ tenders fuq kull ħarġa tal-Gazzetta tal-Gvern biex isib tender speċifika.  L-informazzjoni kollha relatata mal-offerta tista’ titniżżel mis-sistema u s-sottomissjoni tal-offerti tista’ ssir ukoll online.  Is-sommarji tal-offerti riċevuti u l-avviżi tal-għoti huma kollha disponibbli fuq is-sistema filwaqt li l-kjarifiki tal-offerti huma mitluba u sottomessi wkoll permezz tas-sistema.  Id-Dipartiment tal-Kuntratti jorganizza sessjonijiet ta’ taħriġ kull ġimgħa għall-operaturi ekonomiċi u għandu servizz apposta ta’ customer care fuq is-sistema.

Mill-01 ta’ Jannar 2016 is-Sistema Elettronika tal-Akkwist Pubbliku saret l-unika għodda użata għas-sejħiet għall-offerti tal-Gvern.  Mit-tnedija uffiċjali tagħha fl-2011, aktar minn 17,000 sejħa għall-offerti (CfTs) ġew ippubblikati permezz tas-sistema u sal-aħħar ta’ Marzu 2016 kien hemm 3,243 operatur ekonomiku rreġistrati fuq is-sistema. Fejn jidħol taħriġ, s’issa twasslu 144 workshop mill-IT Unit tad-Dipartiment għal 947 impjegat ta’ operaturi ekonomiċi li jagħtu taħriġ prattiku dwar kif tintuża s-sistema.

Is-Sistema Elettronika tal-Akkwist Pubbliku kienet ta’ benefiċċju kbir għall-intrapriżi peress li naqqset l-ispejjeż amministrattivi u wasslet iż-żmien u żiedet l-aċċessibilita’ u t-trasparenza fl-akkwist pubbliku tal-Gvern.

Il-premju tan-NESA li rċieva d-Dipartiment tal-Kuntratti għandu miegħu premju ta’ €10,000 li d-Dipartiment iddeċieda li jagħti lill-Fondazzjoni Puttinu Cares.  Id-Dipartiment tal-Kuntratti issa se jkun qed jirrappreżenta lil Malta fil-European Enterprise Promotion Awards 2016 li se jkunu organizzati aktar tard din is-sena fis-Slovakkja.